IPL 2018 : પ્લેઓફ માટે કોલકાતા અને રાજસ્થાનમાં કાંટે કી ટક્કર

Date:2018-05-15 13:51:32

Published By:Jay

કોલકાતા  : કિંગ્સ ઇલેવન પંજાબ, ચેન્નાઈ સુપર કિંગ્સ અને રવિવારે મુંબઈ ઇન્ડિયન્સને હરાવીને રાજસ્થાન રોયલ્સની ટીમ અચાનક જ ફેવરિટ બની ગઈ છે ત્યારે ઇન્ડિયન પ્રીમિયર લીગ (આઇપીએલ)ની ટી20 ક્રિકેટ ટુર્નામેન્ટમાં મંગળવારે તેના જેટલા જ પોઇન્ટ ધરાવતી કોલકાતા નાઇટ રાઇડર્સ સામે તેનો મુકાબલો અહીંના ઇડન ગાર્ડન્સ ખાતે થશે. રાત્રે 8.00 કલાકે મેચનો પ્રારંભ થશે. આઇપીએલના પ્રારંભિક તબક્કામાં રાજસ્થાન રોયલ્સે ખાસ સફળતા હાંસલ કરી ન હતી અને કેપ્ટન અજિંક્ય રહાણેની આકરી ટીકા થતી હતી પરંતુ છેલ્લી કેટલીક મેચથી ઇંગ્લેન્ડના બેટ્સમેન જોઝ બટલરના શાનદાર ફોર્મની મદદથી 2008ની ચેમ્પિયન ટીમ ઉપરા ઉપરી વિજય હાંસલ કરી રહી છે અને હવે પ્લે ઓફમાં પ્રવેશવા માટે તે નજીકની હરીફ કોલકાતા અને પંજાબને ટક્કર આપવા સક્ષમ બની ગઈ છે..

૩ ટીમો વચ્ચે ટક્કર :

ટુર્નામેન્ટના હાલના તબક્કે પંજાબ, કોલકાતા અને રાજસ્થાન 12-12 પોઇન્ટ ધરાવે છે અને ત્રણેયનું ભાવિ એકાદ બે દિવસમાં નક્કી થઈ જશે. મંગળવારના મુકાબલા બાદ બેમાંથી એક ટીમ કદાચ ટુર્નામેન્ટમાંથી બહાર થઈ શકે છે. ચેન્નાઈ અને સનરાઇઝર્સ હૈદરાબાદે અગાઉતી પોતાનો પ્લે ઓફ પ્રવેશ નિશ્ચિત કરી લીધો છે. આમ બાકી રહેલી ટીમમાંથી કોઈ બે ટીમ આ સ્થાન હાંસલ કરી શકે તેમ છે જેમાંથી દિલ્હી અને બેંગલોરની શક્યતા રહી નથી. આ વખતની આઇપીએલમાં કોલકાતા અને રાજસ્થાન બંનેએ મોડેથી ફોર્મ ધારણ કર્યું છે. ઉપરા ઉપરી પરાજય બાદ કોલકાતાએ વળતો પ્રહાર કરીને પંજાબ સામે છ વિકેટે 245 રનનો આ સિઝનનો સર્વોચ્ચ અને આઇપીએલના ઇતિહાસનો ચોથો સર્વોચ્ચ સ્કોર નોંધાવીને 31 રનથી વિજય હાંસલ કર્યો હતો. 

રાજસ્થાને વિજયની હેટ્રિક નોંધાવી :

બીજી તરફ ટુર્નામેન્ટમાંથી ફેંકાઈ જવાને આરે આવી ગયેલી રાજસ્થાન રોયલ્સની ટીમે જોશ બટલરના ઉમદા ફોર્મની સહાયથી વિજયની હેટ્રિક નોંધાવી છે. તેમણે કિંગ્સ ઇલેવન પંજાબ અને ચેન્નાઈ સુપર કિંગ્સ જેવી મજબૂત ટીમને પરાસ્ત કર્યા બાદ રવિવારે મુંબઈ ઇન્ડિયન્સની ટુર્નામેન્ટમાં ટકી રહેવાની આશા ઉપર પાણી ફેરવી દીધું હતું. રોયલ્સના આ ત્રણેય વિજયમાં જોશ બટલર મેન ઓફ ધ મેચ રહ્યો હતો..

જોશ બટલર રાજસ્થાનનો હીરો :

જોશ બટલરે મુંબઈ સામેના સાત વિકેટના વિજયમાં અણનમ 94 રન ફટકાર્યા હતા તો તેના બે દિવસ અગાઉ ચેન્નાઈ સામે અણનમ 95 રન ફટકાર્યા હતા. જોઝ બટલર આઇપીએલમાં સળંગ પાંચ અડધી સદી નોંધાવી ચૂક્યો છે અને આમ કરીને તેણે વીરેન્દ્ર સેહવાગના રેકોર્ડની બરાબરી કરી છે. છેલ્લી પાંચ ઇનિંગ્સમાં બટલરે 67, 51, 82, 95*, 94*ના સ્કોર નોંધાવ્યા છે. મંગળવારે કોલકાતા સામે બે બેટ્સમેનનું જોખમ રહેલું છે જેમાં બટલર ઉપરાંત બેન સ્ટોક્સનો સમાવેશ થાય છે. દિનેશ કાર્તિકની ટીમના બોલર્સ આ બે ખેલાડીને સસ્તામાં આઉટ કરી દે તો તેમની અડધી કામગીરી પૂર્ણ થઈ જશે. ઇડન ગાર્ડન્સ ખાતે કોલકાતાની ટીમની આ અંતિમ મેચ છે. જોકે તેઓ ત્રીજા કે ચોથા સ્થાને રહે તો તેમને આ મેદાન પર પ્લે ઓફની મેચમાં રમવાની તક મળી શકે તેમ છે..

Cricket Score

WhatsApp Registraltion

Close