ટાટા આગામી 4 વર્ષમાં 10 બેટરી ઇલેક્ટ્રિક વાહનો લોન્ચ કરવાનું પ્લાનિંગ કરે છે

ટાટા મોટર્સે આજે 28 સપ્ટેમ્બરે એટલે કે 'ટાટા ટિયાગો' નું ઇલેક્ટ્રિક વેરિઅન્ટ લોન્ચ કર્યું છે. આ કારની શરૂઆતની કિંમત 8.49 લાખ રૂપિયા છે. આ કાર દેશની સૌથી સસ્તી ઇલેક્ટ્રિક કાર છે. આ કાર સિંગલ ચાર્જમાં 315 કિલોમીટરની રેન્જ આપશે. તો કાર માટે 10 ઓક્ટોબરથી બુકિંગ ચાલુ થશે અને ડિલિવરી જાન્યુઆરી 2023થી મળશે.

આ કંપની પહેલેથી જ ટાટા નેક્સન EV અને ટાટા ટિગોર EV સહિતનાં મોડલ સાથે દેશમાં EV સેગમેન્ટમાં ધૂમ મચાવી રહી છે. ટાટા ટિયાગોની બેટરી ડીસી ફાસ્ટ ચાર્જરથી બેટરીને 80% સુધી ચાર્જ કરવામાં 57 મિનિટ લાગી શકે છે. કારનાં ફીચર્સ વિશે વાત કરવામાં આવે તો ટિયાગોમાં 8 સ્પીકર સિસ્ટમ, રેઈન સેન્સિંગ વાઈપર્સ, ક્રૂઝ કંટ્રોલ, પુશ બટન સ્ટાર્ટ/સ્ટોપ, ઇલેક્ટ્રિક ORVM સહિત અનેક ફીચર્સ છે. આ EV પર બેટરી અને મોટર વોરંટી 1,60,000 કિમી સુધી રહેશે. ટાટા ટિયાગો EVમાં બે ડ્રાઇવિંગ મોડ હશે. આ કાર 5.7 સેકન્ડમાં 0થી 60 kmphની સ્પીડ પકડી લેશે.

આગામી 4 વર્ષમાં 10 કાર લોન્ચ કરવાનો પ્લાન
ટાટા આગામી 4 વર્ષમાં 10 બેટરી ઇલેક્ટ્રિક વાહનો લોન્ચ કરવાનું પ્લાનિંગ કરે છે. આ સાથે ચેરમેન એન. ચંદ્રશેખરે 76મા વાર્ષિક અહેવાલમાં શેરધારકોને સંબોધતાં જણાવ્યું હતું કે ભારતમાં અમારા પોર્ટફોલિયોમાં ઈલેક્ટ્રિક વાહનોની પહોંચ આ વર્ષે બમણી થઈને 2% થઈ છે.

તેમણે આ સાથે જ કહ્યું હતું કે આગામી વર્ષોમાં ઇલેક્ટ્રિક કારમાં તેજીની પણ આશા છે. 2025 સુધીમાં ટાટા મોટર્સ પાસે 10 નવાં BEV વાહનો હશે. ટાટા ગ્રુપ ચાર્જિંગ ઈન્ફ્રાસ્ટ્રક્ચરની સ્થાપનામાં પણ રોકાણ કરશે.