જૂનાગઢના મેંદરડામાં સૌથી વધુ 4 ઈંચ વરસાદ વરસ્યો

નવી દિલ્લી: ગુજરાતમાં નૈઋત્યના ચોમાસાનું સત્તાવાર આગમન બે સપ્તાહ અગાઉ જ થયું હતું. પરંતુ સાનૂકૂળ ગતિ નહીં મળવાને કારણે ચોમાસાનું પ્રભુત્વ જોવા મળ્યું નહોતું. પરંતુ હવે આખરે ગુજરાતમાં ચોમાસું જામવા આવ્યું છે. ગઈકાલે રાજ્યના 66 તાલુકામાં મેઘમહેર થઈ હતી. જેમાં જૂનાગઢના મેંદરડામાં બે કલાકમાં 3 ઈંચ વરસાદ ખાબક્યો હતો. તેમજ કાલાવડમાં વરસાદી માહોલ જામ્યો હતો. આગામી બે દિવસ રાજ્યમાં ભારે થી અતિભારે વરસાદની હવામાન વિભાગ દ્વારા કરવામાં આવી છે.

જૂનાગઢ જિલ્લામાં મેઘરાજાની પધરામણી 

જૂનાગઢ જિલ્લામાં આખરે લાંબા સમય રાહ જોવડાવ્યા બાદ ગઈકાલે મેઘરાજાની પધરામણી થઈ હતી. જેમાં મેંદરડામાં ચાર તેમજ ગ્રામ્ય વિસ્તારોમાં ત્રણ થી પાંચ ઇંચ વરસાદ થયો હતો. જ્યારે જૂનાગઢ અને વંથલી પંથકમાં અઢી ઈંચ વરસાદ થયો હતો. વિસાવદરમાં બે ઈંચ, માળિયા હાટીનામાં દોઢ ઇંચ, કેશોદમાં ભારે પવન સાથે એક ઇંચ જ્યારે ભેંસાણમાં ઝાપટા વરસ્યા હતા. માંગરોળમાં બે મીમી વરસાદ થયો છે. 

આગામી ૩ દિવસ ક્યાં વરસાદની આગાહી...

24 જૂને નર્મદા-સુરત-ડાંગ તાપીમાં ભારેથી અતિભારે. ભરૂચ-નવસારી- સૌરાષ્ટ્ર-કચ્છમાં ભારે વરસાદની આગાહી જયારે અમરેલી, ગીરસોમનાથમાં ભારે વરસાદની આગાહી છે. જ્યારે અમદાવાદ, ગાંધીનગર, બનાસકાંઠા, પાટણ, વડોદરા, છોટાઉદેપુર, રાજકોટ, જામનગર, દ્વારકા, બોટાદ, કચ્છમાં હળવાથી મધ્યમ વરસાદની આગાહી છે.

25 જૂને દાહોદ, છોટા ઉદેપુરમાં ભારે થી અતિભારે. ઉત્તર ગુજરાત અને સૌરાષ્ટ્ર-કચ્છમાં ભારે વરસાદની આગાહી છે.

26 જૂને બનાસકાંઠા, સાબરકાંઠામાં ભારે વરસાદની આગાહી છે.