સોશિયલ મીડિયા યુઝર્સે #Sudananimalrescue કરીને સિંહને બચાવવા ઓનલાઇન કૅમ્પેન શરુ કર્યું
સુદાન: આફ્રિકાના સૌથી મોટા દેશ સુદાનના પ્રાણી સંગ્રહાલયના ફોટોઝ સોશિયલ મીડિયા પર વાઇરલ થઈ રહ્યા છે. સુદાનમાં આવેલ ખારતોમ-અલ-કુરેશી પાર્કમાં 5 આફ્રિકન સિંહ દયનીય હાલતમાં દિવસો પસાર કરી રહ્યા છે. 5 આફ્રિકન સિંહને યોગ્ય સારવાર અને ખાવાનું ન મળતું હોવાથી તેઓ જીવતાં હાડપિંજર જેવાં દેખાઈ રહ્યાં છે. સોશિયલ મીડિયા યુઝર્સે આ સિંહોને બચાવવા માટે ઓનલાઇન કૅમ્પેન શરુ કર્યું છે. તેઓ દેશના વડાપ્રધાનને મદદ કરવા માટે વિનંતી કરી રહ્યા છે.
આ પાંચેય આફ્રિકન સિંહને પહેલી નજરે જોતાં કોઈ પણ કહી શકે છે કે તેમને દવા અને જમવાનું મળતું નથી. સોશિયલ મીડિયા પર #Sudananimalrescue કરીને લોકો આ સિંહને બચાવવા માટે પ્રાર્થના કરી રહ્યા છે.
પાર્કના મેનેજરે કહ્યું-રોજ જમવાનું આપીએ તેટલા રૂપિયા નથી
સોશિયલ મીડિયા પર આ ફોટોઝ વાઇરલ થતાં પાર્કના મેનેજરે જણાવ્યું કે, દરરોજ આફ્રિકન સિંહને જમવાનું આપવું તે અમારા માટે શક્ય નથી. ઘણી વખત અમે અમારે પોતાના રૂપિયામાંથી પણ ભોજન ખરીદવું પડે છે. આ પાર્કનું મેનેજમેન્ટ સુદાનની રાજધાની ખરતુમની મ્યુનિસિપાલિટી સંભાળે છે, ક્યારેક આ પાર્કને પ્રાઇવેટ દાન પણ મળે છે.
રવિવારે સોશિયલ મીડિયા પર વાઇરલ થયેલા ફોટોઝ પછી આ આફ્રિકન સિંહોને બચાવવા માટે સ્થાનિકો, સ્વયંસેવકો અને પત્રકારો જોડાયા છે.