કોરોનાની મહામારી વચ્ચે નવી નોકરીઓને ધ્યાનમાં રાખતા આ પગલાં લેવામાં આવ્યા છે

ડોનાલ્ડ ટ્રમ્પની સરકારે H-1B વિઝાને લઈને નવા નિયમ બહાર પાડ્યા છે. હોમલેન્ડ સિક્યુરિટી ડિપાર્ટમેન્ટે મંગળવારે H-1B વિઝા પર એક નવું નિયમન જાહેર કર્યું છે. ટ્રમ્પ સરકારે અન્ય દેશોના ટેલેન્ટેડ કર્મચારીઓને આપવામાં આવતા વિઝાની સંખ્યાને ઘટાડવાની યોજનાની જાહેરાત કરી છે.

H-1B વિઝા મેળવવામાં 70% ભારતીયો હોય છે
અધિકારીઓનાં જણાવ્યા પ્રમાણે, કોરોના મહામારીના કારણે નવી નોકરીઓને ધ્યાનમાં રાખતા આ પગલાં ભરવામાં આવ્યા છે. ટ્રમ્પના આ નવા આદેશ બાદ ભારતીય આઇટી કંપનીઓને ઝટકો લાગી શકે છે. જો કે આ નિયમ અમેરિકન કર્મચારીઓ માટે રાહતભર્યો રહેશે. આપને જણાવીએ કે અમેરિકા દર વર્ષે 85000 H-1B વિઝા આપે છે

H-1B વિઝા દ્વારા નોકરી કરવા માટે વિદેશી ટેલેન્ટેડ કર્મચારીઓ અમેરિકા જાય છે. આંકડા અનુસાર, અમેરિકા જેટલા પણ લોકોને H-1B વિઝા આપે છે તેમના70% વિઝા ભારતીય પ્રોફેશનલ્સને આપવામાં આવે છે. આ મામલે ભારત બાદ ચીન બીજા નંબરે છે.

શું છે H-1B વિઝા?
H-1B વિઝા બિન-સ્થળાંતરિત વિઝા છે. અમેરિકન કંપનીઓ આના દ્વારા અન્ય દેશોના ટેકનિકલ એક્સપર્ટની નિમણૂંક કરે છે. નિમણૂંક બાદ સરકાર સમક્ષ આ લોકો માટે H-1B વિઝા માંગવામાં આવે છે. અમેરિકાની મોટાભાગની આઇટી કંપનીઓ દર વર્ષે ભારત અને ચીન જેવા દેશોમાંથી લાખો કર્મચારીઓનીનિમણૂંક આ વિઝા દ્વારા કરે છે.

નિયમો અનુસાર, જો કોઈ H-1B વિઝાધારકનું કંપનીએ તેની સાથેનો કોન્ટ્રાક્ટ પૂર્ણ કરી લીધો છે તો વિઝા સ્ટેટસ જાળવી રાખવા માટે તેને 60 દિવસની અંદર બીજી કંપનીમાં નોકરી મેળવી લેવાની રહેશે. યુએસસીઆઇએસ મુજબ, H-1B વિઝાના સૌથી વધુ લાભાર્થી ભારતીયો જ છે.

લેબર ડિપાર્ટમેન્ટના નિયમો આજથી લાગુ થઈ શકે છે
લઘુતમ વેતનની જરૂરિયાતો માટે શ્રમ વિભાગના સુધારા ગુરુવારથી લાગુ થવાની શક્યતા છે. ડીએચએસના એચ-1બી ફેરફારો પણ 60 દિવસમાં આવી જશે. અમેરિકન લેબર ડિપાર્ટમેન્ટના જણાવ્યાનુસાર, જ્યારે એચ-1બી, એચ-1બી1 કે ઈ-3 વિઝા માટે માંગ કરાય છે, ત્યારે અમેરિકન એમ્પ્લોયરે એ નક્કી કરવું પડશે કે, તેઓ અધિકૃત રોજગારીના સમયગાળા દરમિયાન નોન-ઈમિગ્રન્ટ વર્કરોને ચુકવણી કરશે.

વિઝાધારકોએ કહ્યું- અમને આશ્ચર્ય નથી થયું, આ નિર્ણય ટ્રમ્પની તરફેણમાં ગેમચેન્જર બનશે
ન્યૂયોર્કમાં જેપી મોર્ગન સાઈટ પર હાજર એક એચ-1બી વિઝાધારકે કહ્યું કે, જો ટ્રમ્પ સરકારે આ જાહેરાત ના કરી હોત, તો અમને આશ્ચર્ય થાત! આ નિર્ણય ટ્રમ્પની તરફેણમાં ગેમચેન્જર સાબિત થઈ શકે છે.’ અનેક એચ-1બી વિઝાધારકોનું આવું માનવું છે. ટ્રમ્પ પહેલેથી જ અમેરિકનોને નોકરી આપવાનો નારો બુલંદ રીતે ઉઠાવતા આવ્યા છે. આ નિર્ણય પછી અમેરિકન લેબર ડિપાર્ટમેન્ટ, યુએસસીઆઈએસ અને ડીએચએસનું કામ વધી ગયું છે કારણ કે, તેઓ જ એચ-1બી વિઝાધારકો વચ્ચેનું સંકલન સંભાળે છે અને તેમના પર દેખરેખ રાખે છે.

કંપની સાથે કોન્ટ્રાક્ટ ખતમ થશે, તો 60 દિવસમાં નવી નોકરી શોધવી પડશે
જો કોઈ એચ-1બી વિઝાધારક વ્યક્તિની કંપની તેની સાથેનો કોન્ટ્રાક્ટ ખતમ કરશે, તો વિઝા સ્ટેટસ ચાલુ રાખવા માટે તે વ્યક્તિએ 60 દિવસમાં નવી નોકરી શોધી લેવી પડશે.