તાનાશાહ કિમ જોંગે લશ્કરી પરેડને સંબોધિત કરતા કહ્યું- અમે કોઈ પણ પ્રકારના યુદ્ધથી બચવા અમારી શક્તિ વધારતા રહીશુ

ઉત્તર કોરિયાએ શનિવારે સત્તારૂઢ પક્ષના 75મા સ્થાપના દિવસની ઉજવણી કરી. આ પ્રસંગે લશ્કરી પરેડમાં દેશની નવી ઈન્ટર કોન્ટિનેન્ટલ બેલેસ્ટીક મિસાઈલ (ICBM) પ્રદર્શિત કરવામાં આવી હતી. રાત્રીના સમયે યોજાયેલી પરેડમાં આતશબાજી પણ કરવામાં આવી હતી. હથિયારોથી સજ્જ ગાડીઓનો એક વિશાળ કાફલો પણ નિકળ્યો હતો. ઉત્તર કોરિયાના સરકારી મીડિયાએ આ અંગે માહિતી આપી હતી.

નવી બેલેસ્ટીક મિસાઈલને ટ્રાન્સપોર્ટર ઈરેક્ટર લોન્ચર (TEL) મારફતે પરેડમાં રજૂ કરવામાં આવી હતી. સ્થાનિક મીડિયાના જણાવ્યા પ્રમાણે આ નવી મિસાઈલ ઉત્તર કોરિયા પાસે અગાઉથી રહેલી હૃાસોંગ-15 મિસાઈલથી પણ લાંબી છે. હૃાસોંગ મિસાઈલ 12 હજાર 874 કિલોમીટર સુધી પ્રહાર કરવાની ક્ષમતા ધરાવે છે. તે અમેરિકા ખંડના કોઈ પણ વિસ્તારને લક્ષ્યાંક બનાવી શકવા માટે સક્ષમ છે.

સબમરીન લોંચ બેલેસ્ટીક મિસાઈલ પણ પ્રદર્શિત કરી
ઉત્તર કોરિયામાં શનિવારે 2018 બાદ પહેલી વખત મિલિટ્રી પરેડ કાઢવામાં આવી હતી. ઉત્તર કોરિયાએ સબમરીન-લોંચ બેલેસ્ટીક મિસાઈલ પણ રજૂ કરી. તેનું નામ પુકુગસોંગ-4 છે. તે દેશમાં અગાઉ તૈયાર કરવામાં આવેલી અન્ય મિસાઈલની તુલનામાં વધારે અંતર સુધી પ્રહાર કરી શકે છે. પરેડમાં ઉત્તર કોરિયાએ રશિયામાં તૈયાર કરવામાં આવેલી શોર્ટ રેન્જ મિસાઈલ ઈસ્કેન્ડર અને અનેક રોકેડ લોંચર પણ પ્રદર્શિત કરી.

શક્તિ વધારવાનું ચાલુ રાખવામાં આવશેઃ કિમ જોંગ
તાનાશાહ કિમ જોંગે લશ્કરી પરેડને સંબોધિત કરતા કહ્યું કે અમે કોઈ પણ યુદ્ધથી બચવા માટે આપણી શક્તિને વધારવાનું ચાલુ રાખશું. આ હથિયાર સંપૂર્ણપણે આપણી સુરક્ષા માટે છે. આપણે તેનો ક્યારેય ખોટો કે બિનજરૂરી રીતે ઉપયોગ કરી શકતા નથી. જોકે, કોઈ સેના અમારી ઉપર શક્તિ દેખાડવાનો પ્રયત્ન કરશે તો અમે ચોક્કસ તેમને સજા આપશું. અમે તેની સામે પૂરી શક્તિ સાથે હુમલો કરશું