રિચર્ડ બ્રેન્સનની સ્થાપિત કંપનીએ 2021માં કોમર્શિયલ સેવાઓ શરૂ કરી હતી

વોશિંગ્ટન: બ્રિટિશ અબજોપતિ સર રિચર્ડ બ્રેન્સનની રોકેટ કંપની વર્જિન ઓર્બિટે યુએસ ડેલાવેરે કોર્ટમાં નાદારી માટે અરજી કરી છે. નવું ભંડોળ ન મળતાં આ અરજી દાખલ કરવામાં આવી છે. સેટેલાઇટ લોન્ચ કંપનીએ અઠવાડિયા પહેલા તેની કામગીરી બંધ કરી દીધી હતી પરંતુ બિઝનેસ માટે ખરીદદાર શોધવાની આશા છે. કેલિફોર્નિયા સ્થિત કંપનીએ ગયા અઠવાડિયે તેના 750 કર્મચારીઓના 85% કર્મચારીઓને છૂટા કરવાની યોજના જાહેર કરી હતી.

આ વર્ષની શરૂઆતમાં, વર્જિન ઓર્બિટનું રોકેટ યુકેની ધરતી પરથી તેનું પ્રથમ સેટેલાઈટ લોન્ચ કરવામાં નિષ્ફળ ગયું હતું. તેની નિષ્ફળતાનું કારણ રોકેટ ફ્યુઅલ ફિલ્ટરનું વિસ્થાપન હતું, જેના કારણે તેનું એક એન્જિન વધુ ગરમ થઈ ગયું હતું. વર્જિન ઓર્બિટની સ્થાપના 2017માં થઈ હતી અને તે સર રિચાર્ડની સ્પેસ ટૂરિઝમ કંપની વર્જિન ગેલેક્ટિકનું સ્પિન-ઓફ છે. તે અવકાશમાં સેટેલાઈટ મોકલવા માટે મોડિફાઈડ બોઇંગ 747 એરક્રાફ્ટમાંથી રોકેટ લોન્ચ કરે છે.

મિશનની નિષ્ફળતા પછી ભંડોળ પ્રાપ્ત થયું નથી
વર્જિન ઓર્બિટના મિશનને યુકેના અવકાશ સંશોધન માટે સીમાચિહ્નરૂપ તરીકે જોવામાં આવ્યું હતું. દેશને ગ્લોબલ પ્લેયરમાં ફેરવવામાં મદદ કરવા માટે તે એક મોટું પગલું હોવાની અપેક્ષા હતી જે સેટેલાઇટ પ્રોડક્શનથી લઈને રોકેટ અને નવા સ્પેસપોર્ટના નિર્માણ સુધી વિસ્તરણ કરશે. મિશનની નિષ્ફળતા પછી, વર્જિન ઓર્બિટે નવું ભંડોળ એકત્ર કરવા માટે સખત પ્રયાસ કર્યો, પરંતુ તે સફળ થઈ નહીં.

2021માં કોમર્શિયલ સર્વિસ શરૂ કરી
રિચર્ડ બ્રેન્સનની સ્થાપિત કંપનીએ 2021માં કોમર્શિયલ સેવાઓ શરૂ કરી હતી. તેણે વ્યાપારી, નાગરિક, રાષ્ટ્રીય સુરક્ષા અને આંતરરાષ્ટ્રીય સેટેલાઈટને ઓર્બિટમાં છોડ્યા છે. અત્યાર સુધીમાં કંપનીએ 33 સેટેલાઈટને ઓર્બિટમાં તરતા મૂક્યા છે. વર્જિન ઓર્બિટના લોન્ચરવન રોકેટને કેલિફોર્નિયાના લોંગ બીચમાં ડિઝાઇન અને મેન્યુફેક્ચર કરવામાં આવ્યું છે.

ટેક્નોલોજી ખરીદદારોને આકર્ષશે
વર્જિન ઓર્બિટના સીઈઓ ડેન હાર્ટે કહ્યું, 'અમે માનીએ છીએ કે આ ટીમે બનાવેલી અત્યાધુનિક લોન્ચ ટેક્નોલોજી ખરીદદારોને આકર્ષશે. કંપનીએ કહ્યું કે તેની એક પેટાકંપની - વર્જિન ઇન્વેસ્ટમેન્ટ્સ - ખરીદનાર શોધવામાં મદદ કરવા માટે વર્જિન ઓર્બિટને 31.6 મિલિયન ડોલરનું ભંડોળ પૂરું પાડશે. ફાઇલિંગ અનુસાર, 30 સપ્ટેમ્બર સુધીમાં કંપની પાસે લગભગ 243 મિલિયન ડોલરની સંપત્તિ હતી અને કુલ દેવું 153.5 મિલિયન ડોલર હતું.