રવિચંદ્રન અશ્વિને પોતાના 4 ઓવરના સ્પેલમાં માત્ર 17 રન આપીને સ્ટીવ સ્મિથની વિકેટ લીધી હતી
IPL 2020ની 30મી મેચમાં દિલ્હી કેપિટલ્સે
રાજસ્થાન રોયલ્સને 13 રને
હરાવ્યું. 162 રનનો
પીછો કરતા રાજસ્થાન 20 ઓવરમાં
8 વિકેટે
148 રન જ
કરી શક્યું. 13 રનના
માર્જિનથી કોઈ ટીમ હારી હોય ત્યારે સામાન્યપણે એવું લાગે કે, મેચ બરાબરીની રહી હશે. જોકે, ગઈકાલે દુબઈમાં રમાયેલી મેચમાં
રાજસ્થાનનું રનચેઝ દરમિયાન 15 ઓવર સુધી પ્રભુત્વ રહ્યું હતું, ઓપનર બેન સ્ટોક્સ અને જોસ બટલરે
ટીમને સારી શરૂઆત અપાવી જીત માટેનું સ્ટેજ પણ તૈયાર કરી આપ્યું હતું. પરંતુ મિડલ
ઓર્ડરે દિલ્હીના એનરિચ નોર્ટજે અને કગીસો રબાડા જેવા ફાસ્ટ બોલર્સ સામે હથિયાર
હેઠા મુકતા સ્ટીવ સ્મિથની ટીમે વધુ એક વખત નિરાશ કર્યા. ગઈ મેચમાં આઉટ ઓફ ફોર્મ
સ્મિથ અને આઉટ ઓફ ફોકસ તેવટિયાની બેટિંગ અને ઉથપ્પાએ પરાગને રનઆઉટ કર્યા તે અંતે
નિર્ણાયક સાબિત થયા.
સ્ટીવ સ્મિથનું ખરાબ ફોર્મ જારી, ટીમ માટે ચિંતાનો મુખ્ય વિષય
રોયલ્સની
સીઝન ખરાબ જઈ રહી છે. તેઓ પોઈન્ટ્સ ટેબલમાં સાતમા ક્રમે છે. તેમની સમસ્યાની શરૂઆત
તેમના કેપ્ટન સ્ટીવ સ્મિથના ફોર્મથી જ થાય છે. સ્મિથે ટૂર્નામેન્ટમાં સારી શરૂઆત
કરતા પ્રથમ બે મેચમાં ફિફટી મારી હતી. જોકે, તે પછી છેલ્લી 6 મેચમાં 7.33ની એવરેજથી 44 રન જ કરી શક્યો છે. સ્મિથ બેટિંગ
કરતો હોય ત્યારે સ્પષ્ટપણે દેખાય છે કે તે પોતે મૂંઝવણમાં છે કે, એટેક કરું કે શાંતિથી રમું. તેની
મૂંઝવણ પાછળનું કારણ એ છે કે મિડલ ઓર્ડરમાં રોબિન ઉથપ્પા, રિયાન પરાગ અને રાહુલ તેવટિયા જેવા
ખેલાડીઓ છે. જેમના પર સ્મિથને ભરોસો નથી કે તેઓ કન્સીસ્ટન્સી સાથે મેચ ક્લોઝ કરી
શકશે. બેન સ્ટોક્સ અને જોસ બટલર ઓપનિંગ કરતા હોવાથી સ્મિથ હજી પોતાની ગેમ વિશે
વિસ્તારમાં સમજી શક્યો નથી.
ઉથપ્પાએ ઈન-ફોર્મ પરાગને
રનઆઉટ કરાવ્યો
રાજસ્થાનને 42 બોલમાં 52 રનની જ જરૂર હતી. ત્યારે
14મી ઓવરના બીજા બોલે
ઉથપ્પાએ અક્ષરની જમણી બાજુ બોલ માર્યો અને દોડવાની શરૂઆત કરી. પરાગને લાગ્યું નહીં
કે રન છે. પરંતુ પાર્ટનરને રિસ્પોન્ડ કરતા તે દોડ્યો. જેવું તેણે દોડવાનું શરૂ
કર્યું ઉથપ્પા પાછો ફરી ગયો. અને અક્ષર પટેલે થ્રો મારીને પરાગને પેવેલિયન ભેગો
કર્યો. પરાગે ગઈ મેચમાં અણનમ 42 રન કરીને ટીમને ફિનિશિંગ લાઈન
ક્રોસ કરાવી હતી. પરંતુ આ વખતે સીનિયર ખેલાડીના લીધે તે કોઈપણ પ્રકારનું યોગદાન
આપી શક્યો નહીં. ઉથપ્પાનું પ્રદર્શન પણ નોંધપાત્ર નહોતું, તેણે 27 બોલમાં 32 રન કર્યા. સેટ થયા છતાં
મેચ જીતાડી શક્યો નહીં.
અશ્વિને 16મી ઓવરમાં 2 રન જ આપ્યા, તેવટિયાએ 4 બોલ ખાલી કાઢ્યા
પોતાની મેચ વિનિંગ
ઇનિંગ્સથી લાઈમલાઈટમાં આવનાર રાહુલ તેવટિયા આ વખતે ફેન્સની આશા પર ખરો ઉતરી શક્યો
નહોતો. ટીમને 5
ઓવરમાં
39
રનની
જરૂર હતી,
ત્યારે
તે અને ઉથપ્પા ક્રિઝ પર ઉભા હતા. દિલ્હીએ અશ્વિનને 16મી ઓવર નાખવાની જવાબદારી
આપી. અશ્વિને ઓવરમાં માત્ર 2 રન જ આપીને 8 અંદરની રનરેટને 9 ઉપર પહોંચાડી દીધી હતી.
ઓવરમાં ઉથપ્પાએ પ્રથમ બોલે સિંગલ લીધા બાદ તેવટિયાએ સતત 4 બોલ ખાલી કાઢ્યા હતા. તે
જ સમયે મેચનું મોમેન્ટમ કેપિટલ્સ તરફ શિફ્ટ થઇ ગયું હતું. અંતિમ 4માંથી 3 ઓવર નોર્ટજે અને રબાડા
નાખવાના હોવાથી રોયલ્સ માટે અશ્વિનમાં રન ફટકારવા જરૂરી હતા. જોકે, તેઓ આવું કરવામાં સદંતર
નિષ્ફ્ળ રહ્યા.