સિલેક્શન કમિટીના જણાવ્યા મુજબ મુસ્તાક અલી ટૂર્નામેન્ટથી ઘરેલુ સીઝનની શરૂઆતથી ખેલાડીઓને આઈપીએલની તૈયારી કરવાની તક મળશે

ભારતીય ક્રિકેટ ટીમના ચીફ સિલેક્ટર સુનિલ જોશીએ બોર્ડ ઓફ કંટ્રોલ ફોર ક્રિકેટ ઈન ઇન્ડિયા(બીસીસીઆઈ)ને નવી સીઝન T-20 થી શરૂ કરવાની સલાહ આપી છે. મીડિયા રિપોર્ટ્સ અનુસાર, થોડા દિવસો પહેલા નેશનલ સિલેક્શન કમિટીની બેઠક થઈ હતી. જેમાં જોશીએ આ સૂચન કર્યું હતું. જો બોર્ડ સહમત થાય તો સામાન્ય રીતે ઓગસ્ટમાં શરૂ થનારી સૈયદ મુસ્તાક અલી  T-20 ટૂર્નામેન્ટથી સીઝન શરૂ થઈ શકે છે.

T-20 વર્લ્ડ કપની તૈયારીઓમાં મદદ કરશે
સિલેક્શન કમિટીના જણાવ્યા મુજબ આનાથી ખેલાડીઓ T-20 વર્લ્ડ કપ માટેની તૈયારી કરી શકશે. આ વર્ષે ઓસ્ટ્રેલિયામાં ઓક્ટોબર-નવેમ્બરમાં ટૂર્નામેન્ટ થવાની છે. તે જ સમયે, ખેલાડીઓને ઈન્ડિયન પ્રીમિયર લીગ માટેની તૈયારી કરવાની તક પણ મળશે. જોકે, આઈપીએલનું શેડ્યુલ હજી નક્કી થયું નથી. પરંતુ વર્તમાન પરિસ્થિતિ અને ફ્યૂચર ટૂર પ્રોગ્રામ જોતાં લીગ સપ્ટેમ્બર-ઓક્ટોબરમાં રમાશે તેવી અપેક્ષા છે.

રોહિત, કોહલી જેવા ખેલાડીઓને પ્રેક્ટિસ કરવાની તક મળશે
મોટાભાગના આંતરરાષ્ટ્રીય ક્રિકેટરો ઘરેલું ક્રિકેટમાં ભાગ લેવાનું પસંદ કરતા નથી. પરંતુ વર્તમાન પરિસ્થિતિમાં તેમને તે દ્વારા પ્રેક્ટિસ કરવાની તક મળશે. આવી સ્થિતિમાં આંતરરાષ્ટ્રીય ક્રિકેટમાં પાછા ફરતા પહેલા વિરાટ કોહલી, રોહિત શર્મા જેવા ઘણા મોટા ખેલાડીઓ તેમની ઘરેલુ ટીમો તરફથી રમી શકે છે. જો આવું થાય, તો વિરાટ 2013 પછી પહેલીવાર દિલ્હી તરફથી રમતો જોવા મળશે.

ધોની પણ ઘરેલું લીગથી T-20માં વાપસી કરી શકે છે
કોહલી છેલ્લે 2013ની એનકેપી ચેલેન્જર ટ્રોફીમાં દિલ્હી માટે રમ્યો હતો. તે જ સમયે, 9 મહિનાથી ક્રિકેટથી દૂર રહેલા મહેન્દ્ર સિંહ ધોની પણ આઈપીએલ પહેલા T-20 ક્રિકેટ રમી શકે છે.

મુસ્તાક અલી ટૂર્નામેન્ટ ખાલી સ્ટેડિયમમાં યોજાઈ શકે છે
જો બીસીસીઆઈ પસંદગી સમિતિના સૂચનને સ્વીકારે તો તેને ઘરેલું T-20 લીગનું આયોજન કરવામાં મુશ્કેલી નહીં પડે. કારણ કે બધી લીગ મેચ લાઇવ બતાવવામાં આવતી નથી. આવી સ્થિતિમાં ખાલી સ્ટેડિયમમાં આ ટૂર્નામેન્ટનું આયોજન કરવામાં બોર્ડને કોઈ તકલીફ પડશે નહીં, જો કે ડોમેસ્ટિક T-20 લીગ અને આઈપીએલના ભવિષ્ય અંગેના સૂચનો પર બોર્ડ 17 મે પછી જ કોઈ નિર્ણય કરશે. લોકડાઉન-3 એ જ દિવસે સમાપ્ત થાય છે.

ગત વર્ષે નવેમ્બરમાં ઘરેલું T-20 ટૂર્નામેન્ટ યોજાઈ હતી
ગયા વર્ષે ઓગસ્ટમાં દુલીપ ટ્રોફીથી 2019-20ની સીઝન શરૂ થઈ હતી. વિજય હજારે સપ્ટેમ્બર-ઓક્ટોબરમાં અને દેવધર ટ્રોફી નવેમ્બરમાં થઇ હતી. આ પછી સૈયદ મુસ્તાક અલી T-20 ટૂર્નામેન્ટ રમવામાં આવી હતી. આ વર્ષે માર્ચમાં રણજી ટ્રોફી ફાઇનલ થઈ હતી. જોકે, ઇરાની કપ કોરોનાને કારણે થઇ શકી નહોતી. તે રણજી ટ્રોફી ચેમ્પિયન સૌરાષ્ટ્ર અને રેસ્ટ ઓફ ઈન્ડિયા વચ્ચે થવાની હતી.