મુંબઈ-દિલ્હીની ફ્લાઇટમાં 2500-3000 ભાડું હોય છે છતાંય ચા-નાસ્તો ઓફર કરાય છે

અમદાવાદથી મુંબઈ કે દિલ્હી જવું હોય તો ફ્લાઈટનું ભાડું 2500થી 3000 છે, સાથે ફ્લાઈટમાં પેેસેન્જરોને ચા-નાસ્તા મળે છે. એની સામે અમદાવાદથી કેવડિયા સુધીની 220 કિલોમીટરની સી-પ્લેનની મુસાફરી માટે ભાડું 4800 છે અને એમાં ચા-નાસ્તાની સુવિધા નહીં મળે. એરલાઈન્સના અધિકારીએ જણાવ્યું હતું કે સામાન્ય રીતે એક કલાકથી ઓછી મુસાફરી દરમિયાન ચા-નાસ્તાની સુવિધા આપવામાં આવતી નથી. સી-પ્લેન નાનું હોવાથી તેમાં અન્ય એરક્રાફ્ટની જેમ ટ્રોલી રાખવી શક્ય નથી. ગુજરાત સ્ટેટ એવિએશન ઇન્ફ્રાસ્ટ્રક્ચર લિમિટેડ (ગુજસેલ)ના એમડી કેપ્ટન અજય ચૌહાણે જણાવ્યું હતું કે સી-પ્લેનમાં કમ્પ્યુટર કંટ્રોલ સિસ્ટમ ન હોવાની સાથે એ ઓછી ઊંચાઈ પર ઊડતું હોવાથી એનું સંપૂર્ણ નિયંત્રણ પાઇલટના હાથમાં જ હોય છે.

અમદાવાદ આવેલું સી-પ્લેન 50 વર્ષ જૂનું હોવાનો દિવ્ય ભાસ્કરમાં મંગળવારે છપાયેલા અહેવાલ વિશે પુછાયેલા સવાલના જવાબમાં ગુજસેલના એમડી કેપ્ટન અજય ચૌહાણે જણાવ્યું હતું કે સી-પ્લેનનું આયુષ્ય લાંબું હોય છે અને જો કોઈ પાર્ટ ખરાબ થાય કે એ એમાં કોઈ ખામી સર્જાય તો મોડ્યુલર પ્લેન હોવાથી સરળતાથી સ્પેર પાર્ટ્સ બદલી શકાય છે. વધુમાં, તેમાં બે એન્જિન હોવાથી આકસ્મિક સમયે કે ટેક્નિકલ સમસ્યા સર્જાય ત્યારે એક એન્જિનથી પણ સી-પ્લેનને ઉડાડી શકાય છે અને નજીકના તળાવ, નદી કે નાળામાં તેનું સુરક્ષિત લેન્ડિંગ કરાવી શકાય છે. ગુજસેલ ફાયર સિસ્ટમ ન ગોઠવે ત્યાં સુધી મ્યુનિ. ફાયરબ્રિગેડ રેસ્ક્યૂ અને ફાયરની જવાબદારી સંભાળશે.

સી-પ્લેનનું સંભવિત સમયપત્રક

કેવડિયાથી રિવરફ્રન્ટ

ટેકઓફ-લેન્ડિંગ સૌથી મોટો પડકાર હોય છે
સાબરમતી રિવરફ્રન્ટથી કેવડિયા સ્ટેચ્યૂ ઓફ યુનિટી સુધી 31 ઓક્ટોબરે સી-પ્લેન સેવાનો પ્રારંભ થશે. અમદાવાદ આવી પહોંચેલા ટ્વિન ઓટ્ટર સી-પ્લેનનું ઉચ્ચ અધિકારીઓ સાથે મંગળવારે ટ્રાયલ લેવામાં આવી હતી. બે એન્જિન અને 1419 લીટર ઈંધણની ક્ષમતા અને 3377 કિ.ગ્રા. વજન ધરાવતું આ સી-પ્લેન મહત્તમ 5670 કિ.ગ્રા. વજન સાથે ઊડી શકે છે. એ 15.77 મીટર (51 ફૂટ) લાંબું અને 5.94 મીટર(19 ફૂટ) ઊંચું છે.

ગુજરાત સ્ટેટ એવિએશન ઇન્ફ્રાસ્ટ્રક્ચર લિમિટેડ (ગુજસેલ)ના એમડી કેપ્ટન અજય ચૌહાણે જણાવ્યું હતું કે સી-પ્લેન દર કલાકે 272 કિલોગ્રામ બળતણ વાપરે છે. આ સી-પ્લેન અન્ય પેસેન્જર પ્લેન કરતાં અલગ હોય છે. સામાન્ય એરક્રાફ્ટ સંપૂર્ણ કમ્પ્યુટર કંટ્રોલ સિસ્ટમ ધરાવે છે. પાઇલટ માટે લેન્ડિંગ-ટેકઓફ મુખ્ય કામગીરી હોય છે. સી-પ્લેનમાં કમ્પ્યુટર કંટ્રોલ સિસ્ટમ ન હોવાની સાથે એ ઓછી ઊંચાઈ પર ઊડતું હોવાથી એનું સંપૂર્ણ નિયંત્રણ પાઇલટના હાથમાં જ હોય છે. એનું ટેકઓફ અને લેન્ડિંગ પ્રવાહીની સપાટી પર હોવાથી એને નિયંત્રણમાં રાખવું વધુ પડકારજનક હોય છે.