દક્ષિણ આફ્રિકાએ બાંગ્લાદેશ સામેની બીજી ODI 7 વિકેટે જીતી લીધી. આ સાથે યજમાન ટીમે 3 મેચની શ્રેણીમાં 1-1ની બરાબરી કરી લીધી છે

જોહાનિસબર્ગમાં દક્ષિણ આફ્રિકા અને બાંગ્લાદેશ (SA vs BAN) વચ્ચે બીજી ODI મેચ રમાઈ હતી, જેમાં દક્ષિણ આફ્રિકાએ શાનદાર પ્રદર્શન કરતા 7 વિકેટે મોટી જીત નોંધાવી હતી. સેન્ચુરિયનમાં રમાયેલી પ્રથમ વનડે મેચમાં બાંગ્લાદેશે અપસેટ સર્જ્યો હતો અને મેચ જીતી લીધી હતી. આવી સ્થિતિમાં જોહાનિસબર્ગમાં યજમાન ટીમે બરાબરી કરી લીધી છે. હવે શ્રેણીની ત્રીજી અને અંતિમ મેચ 23 માર્ચે રમાશે.

ડી કોકે માત્ર 26 બોલમાં ફટકારી અડધી સદી

બાંગ્લાદેશ સામેની બીજી વન-ડે મેચમાં ક્વિન્ટન ડી કોક (Quinton de Kock) એ 41 બોલમાં 9 ચોગ્ગા અને 2 છગ્ગાની મદદથી 62 રન બનાવ્યા હતા. આ ઓપનરે મેચમાં પોતાની 28મી ફિફ્ટી ફટકારી હતી. તેણે આ ફિફ્ટી માત્ર 26 બોલમાં પૂરી કરી હતી.

બાંગ્લાદેશ માત્ર 194 રનમાં ઓલઆઉટ

ધ વુડ્સ સ્ટેડિયમ (The Wanderers Stadium) માં રમાયેલી આ મેચમાં બાંગ્લાદેશે 9 વિકેટ ગુમાવીને 194 રન બનાવ્યા હતા. ખરાબ શરૂઆત બાદ બાંગ્લાદેશે 94ના સ્કોર સુધી તેની 6 વિકેટ ગુમાવી દીધી હતી. અહીંથી અફીફ હુસૈને (Afif Hossain) મેહદી હસન સાથે સાતમી વિકેટ માટે 86 રનની ભાગીદારી કરી હતી. બાંગ્લાદેશ તરફથી હુસૈને 72 રન બનાવ્યા જ્યારે મેહદી હસને 38 અને મહમુદુલ્લાહે 25 રન બનાવ્યા. વિપક્ષી ટીમ વતી કાગીસો રબાડાએ 39 રનમાં 5 વિકેટ ઝડપી હતી.

ક્વિન્ટન ડી કોકની તોફાની ઇનિંગ્સ, દક્ષિણ આફ્રિકાની આસાન જીત

બાંગ્લાદેશે આપેલા લક્ષ્યાંક સામે મેદાન પર ઉતરેલી દક્ષિણ આફ્રિકાની ટીમે 37.2 ઓવરમાં જીતનો લક્ષ્યાંક પાર પાડ્યો હતો. માલાને ક્વિન્ટન ડી કોક સાથે મળીને પ્રથમ વિકેટ માટે 86 રન બનાવ્યા હતા. ક્વિન્ટન ડી કોક (62) સિવાય માલને 26 રન બનાવ્યા હતા. આ પછી સુકાની ટેમ્બા બાવુમાએ કાયલ વેરેન સાથે ત્રીજી વિકેટ માટે 82 રનની ભાગીદારી નોંધાવીને ટીમને જીતના ઉંબરે પહોંચાડી હતી. વેરેને 77 બોલમાં અણનમ 58 રન બનાવ્યા હતા જ્યારે ટેમ્બા બાવુમાએ 37 રન બનાવ્યા હતા. બાંગ્લાદેશ તરફથી મેહદી હસન, શાકિબ અલ હસન અને અફીફ હુસૈને 1-1નો શિકાર કર્યો હતો.