વડોદરામાં શિવરાત્રિના રોજ નીકળેલી શિવજી કી સવારી બાદ ભાજપના નેતાઓ સતત પોઝિટિવ આવી રહ્યા છે

વડોદરા શહેરમાં શિવરાત્રિના રોજ નીકળેલી શિવજી કી સવારી બાદ ભાજપના પૂર્વ કોર્પોરેટરો, કોર્પોરેટરો, ધારાસભ્ય અને સાંસદથી લઇને સંગઠનના​ નેતાઓ કોરોના સંક્રમિત થઇ રહ્યા છે. વડોદરાના સાંસદ રંજનબેન ભટ્ટે 4 માર્ચના રોજ કોરોના વેક્સિનનો પ્રથમ ડોઝ લીધો હતો અને 16 દિવસ બાદ આજે રંજનબેન ભટ્ટનો કોરોનાનો રિપોર્ટ પોઝિટિવ આવ્યો છે. સાંસદ રંજનબેન ભટ્ટે ટ્વિટ કરી હતી કે, મને પ્રાથમિક લક્ષણો જણાતા ગઇકાલે મેં RTPCR ટેસ્ટ કરાવ્યો હતો, જે આજે પોઝિટિવ આવ્યો છે. જે માટે હું સાવચેતીના ભાગરૂપે હોસ્પિટલમાં દાખલ થયેલી છું. મારી સાથે ગત દિવસોમાં સંપર્કમાં આવેલા દરેકને વિનંતી છે કે, તેઓે પોતાનો ટેસ્ટ કરાવે.

ભાજપના પૂર્વ મહિલા કાઉન્સિલર શકુંતલાબેન શિંદેનું મૃત્યું
બીજી તરફ વડોદરા શહેરના વોર્ડ નં-18ના ભાજપના પૂર્વ મહિલા કાઉન્સિલર શકુંતલાબેન શિંદેનું કોરોનાની સારવાર દરમિયાન મૃત્યું થયું છે. છેલ્લા કેટલાક દિવસથી તેમની ગોત્રી હોસ્પિટલમાં કોરોનાની સારવાર ચાલી રહી હતી, જ્યાં આજે તેઓએ અંતિમ શ્વાસ લીધા હતા. જેને પગલે વડોદરા શહેર ભાજપ અને તેમના સમર્થકોમાં શોકનું મોજુ ફરી વળ્યું છે.

ડભોઇના ધારાસભ્ય શૈલેષ મહેતા(સોટ્ટા) કોરોના સંક્રમિત થયા
આ ઉપરાંત વડોદરા જિલ્લાના ડભોઇના ધારાસભ્ય શૈલેષ મહેતા(સોટ્ટા) કોરોના સંક્રમિત થયા છે, તેઓએ સોશિયલ મીડિયા પર આજે સવારે જાણ કરી હતી અને તેમના સંપર્કમાં આવેલા લોકોને ટેસ્ટ કરાવવાની અપીલ કરી હતી.

મહિલા કોર્પોરેટર અને તેમના પતિ કોરોના સંક્રમિત
વોર્ડ નં-11ના મહિલા કોર્પોરેટર મહાલક્ષ્મી શેટિયાર અને તેમના પતિ કોરોના સંક્રમિત થયા છે. આ ઉપરાંત વીએમસીના દંડક ચિરાગ બારોટના માતા, પુત્ર અને પુત્રવધૂ કોરોનાની ચપેટમાં આવ્યા છે અને પૂર્વ કાઉન્સિલર ગોપી તલાટી પણ સંક્રમિત થયા છે.

વડોદરામાં શિવરાત્રિના રોજ નીકળેલી શિવજી કી સવારી બાદ પોઝિટિવ આવેલા નેતાઓની યાદી
1. શબ્દશરણ બ્રહ્મભટ્ટ, પૂર્વ મેયર
2. મીનાબેન ચૌહાણ, કોર્પોરેટર
3. જાગૃતિ કાકા, કોર્પોરેટર
4. શૈલષ મહેતા(સોટ્ટા), ધારાસભ્ય
5. મહાલક્ષ્મી શેટિયાર, કોર્પોરેટર
6. રંજનબેન ભટ્ટ, સાંસદ
7. ગોપી તલાટી, પૂર્વ કોર્પોરેટર

આ અગાઉ કોરોના સંક્રમિત થયેલા ધારાસભ્યો અને મંત્રી

આ અગાઉ કોરોના સંક્રમિત થયેલા સંગઠનના હોદ્દેદારો