દેશ-વિદેશથી આવેલા સ્વયંસેવકોએ દરરોજ એવરેજ 8થી 9 કલાક સેવા યજ્ઞ કર્યો

અમદાવાદ: પ્રમુખસ્વામી નગરના સફળ આયોજન પાછળ 84,965 સ્વયંસેવકોની રાત-દિવસની મહેનતનું પરિણામ છે. આ સેવકોએ દરરોજ એવરેજ 8થી 9 કલાકની સેવા આપી 31 દિવસમાં કુલ 2.33 કરોડ કલાકની સેવા આપી છે. આ સ્વયંસેવકોએ ત્રણ શિફ્ટમાં કામ કર્યું છે.

24 હજારથી વધુ મહિલાઓ અને 20 હજારથી વધુ બાળ સેવકો
નગરમાં રસોડાથી લઈ સ્વચ્છતા વિભાગ, બાળનગરીથી લઈ સાંસ્કૃતિક વિભાગ, ટ્રાન્સપોર્ટથી લઈ ઈલેક્ટ્રિક જેવા 45 વિભાગોમાં સ્વયંસેવકોએ પોતાના નોકરી-વ્યવસાય 1 મહિના કે વધુ સમય માટે છોડી સેવા આપી છે. નોંધનીય વાત એ છે કે 84 હજાર સ્વયંસેવકોમાંથી 24 હજારથી વધુ મહિલાઓ અને 20 હજારથી વધુ બાળ સેવકો હતા.આ સ્વયંસેવકોમાં ડૉક્ટર્સ, એન્જિનયર્સ, શિક્ષક, સરકારી નોકરી કરતા અધિકારીઓ, બિઝનેસના માલિકો, આઈટી ક્ષેત્રના નિષ્ણાતોનો સમાવેશ થાય છે.

દરેક વિભાગમાં સરેરાશ 10થી 12 સંતો માર્ગદર્શન આપતા
40 હજાર જેટલા સ્વયંસેવકોને નગરમાં ઉતારો આપવામાં આવ્યો હતો. આ સાથે 20 હજારથી વધુ સ્વયંસેવકો બસ મારફતે દરરોજ પહોંચતા હતા. દિવસભર કામ કર્યા પછી સ્વયંસેવકોની રિવ્યૂ મીટિંગ પણ થતી જેમાં બીજા દિવસનું પ્લાનિંગ થતું હતું. 45 વિભાગોમાંથી દરેક વિભાગમાં સરેરાશ 10થી 12 સંતો માર્ગદર્શન આપતા હતા. સૌથી વધુ ગુજરાતના 80 હજાર, અન્ય રાજ્યોમાંથી 2172 અને વિદેશમાંથી 1544 સ્વયંસેવકોએ આ નગરમાં એક મહિના માટે સેવા આપી હતી.

રોજના 2 લાખ લોકોના ભોજનની વ્યવસ્થા માટે 10 હજાર સ્વયંસેવકોએ સેવા આપી