સૌરાષ્ટ્રની ટીમે 87 રનમાં 7 વિકેટ ગુમાવી દીધી હતી, જોકે મુંબઈ તે પછી વિકેટ ઝડપી શક્યું ન હતું

રણજી ટ્રોફીની સૌથી સફળ ટીમ મુંબઈના 42મી વખત ટાઈટલ જીતવાના સ્વપ્નને સૌરાષ્ટ્રની ટીમે તોડ્યું. સૌરાષ્ટ્રની ટીમે ગ્રૂપ-Bની મેચમાં મુંબઈ વિરુદ્ધ ડ્રો રમી તેના નોકઆઉટ રાઉન્ડમાં પહોંચવાની શક્યતાઓનો અંત લાવ્યો છે. મુંબઈની ટીમ સૌરાષ્ટ્રની અંતિમ 3 વિકેટ ઝડપવામાં નિષ્ફળ રહી હતી. બીજી ઈનિંગ્સમાં સૌરાષ્ટ્રની ટીમે એક તબક્કે 87 રનમાં 7 વિકેટ ગુમાવી દીધી હતી. જોકે મુંબઈના બોલરો પૂંછડિયા ખેલાડીઓને આઉટ કરી શક્યા નહીં. ધર્મેન્દ્રસિંહ જાડેજા અને કમલેશ મકવાણાએ આઠમી વિકેટ માટે અણનમ 75 રનની ભાગીદારી કરી અને આ માટે તેમણે 239 બોલ રમ્યા હતા. કમલેશે 116 બોલમાં અણનમ 31 અને ધર્મેન્દ્રસિંહે 125 બોલમાં અણનમ 33 રનની ભાગીદારી કરી હતી. આ ભાગીદારીના કારણે સૌરાષ્ટ્રની ટીમ મેચ ડ્રો કરાવવામાં સફળ રહી અને પ્રથમ ઈનિંગ્સની લીડના આધારે 3 પોઈન્ટ મેળવી ક્વાર્ટર ફાઈનલમાં સ્થાન મેળવ્યું હતું. મુંબઈ 262 અને 362/7, સૌરાષ્ટ્ર 335 અને 158/7

બીજી તરફ ગુજરાતની ટીમે પણ ક્વાર્ટર ફાઈનલમાં સ્થાન મેળવી લીધું છે. દિલ્હીએ બીજી ઈનિંગ્સમાં 8 વિકેટે 333 રન કરી ઈનિંગ્સ ડિક્લેર કરી હતી. દિલ્હીએ પ્રથમ ઈનિંગ્સમાં 293 અને ગુજરાતે 335 રન કર્યા હતા. બીજી ઈનિંગ્સમાં ગુજરાતની ટીમે 2 વિકેટે 128 રન કર્યા હતા. પ્રથમ ઈનિંગ્સની લીડના આધારે ગુજરાતને 3 પોઈન્ટ મળ્યા હતા અને ટીમ ક્વાર્ટર ફાઈનલમાં પહોંચી હતી.