21 ડિસેમ્બરની સવારે પહેલા તબક્કામાં યાત્રા હરિયાણામાં પ્રવેશ કરશે

રાજસ્થાનમાં ભારત જોડો યાત્રા અંતિમ તબક્કામાં પહોંચી ચૂકી છે. કાલથી હરિયાણામાં એન્ટ્રી લેશે. યાત્રા આજે અલવર જિલ્લામાં છે. ભારત જોડો યાત્રામાં ભારે ભીડ જોવા મળી રહી છે. હજારો લોકો રાહુલની યાત્રામાં ભાગ લેવા બીજા જિલ્લામાંથી પણ આવી રહ્યા છે.

દરમિયાન 19મી ડિસેમ્બરના રોજ માલાખેડા ખાતે જાહેરસભા દરમિયાન એક રસપ્રદ ઘટના સામે આવી હતી. બેઠક દરમિયાન રાહુલ ગાંધી અને કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે મંચ પર સાથે બેઠા હતા.

રાહુલે જ્યારે પોતાની દાઢી પર હાથ ફેરવ્યો ત્યારે પાસે બેસેલા ખડગેએ પણ હસતાં-હસતાં તેમની દાઢી પર હાથ ફેરવ્યો. હળવા અંદાજમાં બંને નેતા વચ્ચે થોડા સમય સુધી વાતચીત થઈ. આ દરમિયાન ખડગે અને ગાંધી પરિવાર વચ્ચે ગાઢ સંબંધ પણ જોવા મળ્યો. તમને જણાવી દઈએ કે યાત્રા શરૂ થઈ એ સમયથી રાહુલની દાઢીને લઈને રાજનીતિ થઈ રહી છે.

આ પહેલાં આજે 16મા દિવસે યાત્રાનો પહેલો તબક્કો અલવરથી લોહિયાના તિબારામાં થયો. બપોરે 3.30 વાગ્યે બીજા તબક્કાની શરૂઆત થઈ. આજે 23 કિલોમીટરની સફર નક્કી થશે.

ગેહલોતે કહ્યું-યાત્રા અમારા માટે વરદાન સમાન
યાત્રા દરમિયાન પ્રેસ-કોન્ફરન્સમાં સીએમ અશોક ગેહલોતે કહ્યું હતું કે રાહુલ ગાંધીની યાત્રા અમારા માટે વરદાન સમાન સાબિત થઈ છે. દરેક યાત્રા એક સંદેશ આપે છે. આ યાત્રાથી અમને સંદેશ મળ્યો છે કે આગામી બજેટમાં સામાજિક સુરક્ષા પર ફોકસ કરવું છે.

ગેહલોતે કહ્યું હતું કે 19 ડિસેમ્બરના રોજ રાહુલ ગાંધીએ જણાવ્યું હતું કે અમે 1700 અંગ્રેજી શાળા ખોલી. આ ઓછી છે, તો આપણે આ વિશે વિચારવું જોઈએ. જેથી આગામી થોડાં વર્ષોમાં આપણાં બાળકો અંગ્રેજીમાં આગળ વધી શકે.

ભાજપને ખોટું બોલતાં શરમ નથી આવતી
ગેહલોતે કહ્યું- બીજેપીના લોકો ગોબ્બલ્સનાં સગાં છે, તમે સો વખત જૂઠું બોલો તો લોકો તેને સત્ય સમજવા લાગે છે, બીજેપી પણ એવું જ ખોટું બોલી રહી છે. ભાજપને શરમ આવવી જોઈએ. ભાજપ કહે છે કે અમે ખેડૂતોની લોન માફ કરી નથી, જ્યારે 14 લાખ સુધીની લોન માફ કરવામાં આવી છે.

ટિકિટ અને પદ જોઈએ, તો મહિનામાં એક દિવસ 15 કિલોમીટર ચાલવું પડશેઃ દોતાસરા
દોતાસરાએ કહ્યું હતું કે જો તમારે ટિકિટ અને પોસ્ટ જોઈતી હોય તો તમારે એક મહિનામાં દરરોજ 15 કિલોમીટર ચાલવું પડશે. કોંગ્રેસે આગામી મહિનાથી જ મંત્રીઓને મહિનામાં એક દિવસ ચાલવા દેવાના રાહુલના સૂચનનો અમલ કરવાની જાહેરાત કરી છે. કોંગ્રેસના પ્રદેશ પ્રમુખ ગોવિંદસિંહ દોતાસરાએ જણાવ્યું હતું કે 26, 27 જાન્યુઆરીથી મંત્રીઓ, ધારાસભ્યો અને સંગઠનના પદાધિકારીઓ એક દિવસ પદયાત્રા કરશે. અમે ટૂંક સમયમાં તારીખ નક્કી કરીશું. મંત્રી રહેવું હોય, ટિકિટ લેવી હોય અને સંગઠનમાં હોદ્દો લેવો હોય તો મહિનામાં એક દિવસ ચાલવું પડશે.

21 ડિસેમ્બરની સવારે પહેલા તબક્કામાં યાત્રા હરિયાણામાં પ્રવેશ કરશે
21 ડિસેમ્બરની સવારે પહેલા તબક્કા દરમિયાન યાત્રા હરિયાણામાં પ્રવેશ કરશે. અલવર રાહુલ ગાંધીના ગાઢ કોંગ્રેસનેતા અને પૂર્વ કેન્દ્રીય મંત્રી જિતેન્દ્ર સિંહનો વિસ્તાર છે. રાહુલની યાત્રાના સ્વાગત માટે વિસ્તારમાં ઘણા દિવસથી તૈયારી ચાલી રહી છે. જિલ્લાના શકુંતલા રાવત અને ટીકારામ જુલી ગેહલોત સરકારમાં મંત્રી છે.

આજે યાત્રામાં મુખ્યમંત્રી અશોક ગેહલોત સિવાય પંજાબના પૂર્વ મુખ્યમંત્રી ચરણજિત સિંહ ચન્ની પણ ચાલ્યા. બંને નેતા એકબીજાનો હાથ પકડીને ચાલતા દેખાયા. રાહુલ સાથે સ્થાનિક કોંગ્રેસ ધારાસભ્ય અને ઘણા મંત્રી ચાલ્યા. પૂર્વ કેન્દ્રીય સચિવ અને અર્થશાસ્ત્રી અરવિંદ માયારામે પણ મંગળવારે યાત્રામાં ભાગ લીધો હતો.