તમે જેને પણ બોલાવો, મિસ્ટર મોદી, અમે INDIA છીએ - રાહુલ ગાંધી
મણિપુર મુદ્દે મંગળવારે લોકસભા અને
રાજ્યસભામાં ભારે હોબાળો થયો હતો. લોકસભામાં સવારે 11 વાગે કાર્યવાહી
શરૂ થતાં જ વિપક્ષે સૂત્રોચ્ચાર શરૂ કરી દીધા હતા. સ્પીકરે 3 મિનિટ બાદ જ
ગૃહને બપોરે 2 વાગ્યા સુધી સ્થગિત કરી દીધું હતું.અગાઉ કોંગ્રેસ અને આમ આદમી પાર્ટીએ મણિપુર
પર ચર્ચા કરવા માટે બંને ગૃહોમાં સ્થગિત પ્રસ્તાવ આપ્યો હતો.
સંસદીય દળની બેઠક દરમિયાન PMએ વિપક્ષનું
ગઠબંધન I.N.D.I.A નામની સરખામણી ઈસ્ટ ઈન્ડિયા કંપની, પોપ્યુલર ફ્રન્ટ
ઓફ ઈન્ડિયા (PFI) અને ઈન્ડિયન મુજાહિદ્દીન સાથે કરી હતી. મોદીએ કહ્યું કે આનાથી જનતા ગેરમાર્ગે
દોરાશે નહીં.
રાજ્યસભામાં વિપક્ષના નેતા
મલ્લિકાર્જુન ખડગેએ પીએમ મોદીના નિવેદન સામે વાંધો ઉઠાવ્યો હતો. તેમણે કહ્યું- અમે
મણિપુરની વાત કરી રહ્યા છીએ અને વડાપ્રધાન ઈન્ડિયાની સરખામણી ઈસ્ટ ઈન્ડિયા કંપની
સાથે કરી રહ્યા છે. અરે, તમે મણિપુરની વાત કરો ને.
PM મોદીએ 'INDIA' ગઠબંધન બાબતે કહ્યું-
ઇન્ડિયન મુજાહિદ્દીન અને ઈસ્ટ ઈન્ડિયામાં પણ ઈન્ડિયા છે
ચોમાસુ સત્રમાં
મણિપુરને લઈને ચાલી રહેલા સંગ્રામ વચ્ચે મંગળવારે ભાજપ સંસદીય દળની બેઠક યોજાઈ
હતી. વડાપ્રધાન નરેન્દ્ર મોદીએ બેઠક દરમિયાન વિપક્ષની પાર્ટીના ગઠબંધન પર નિશાન
સાધ્યું હતું. મોદીએ કહ્યું, માત્ર ઈન્ડિયા નામ લગાવી દેવાથી કશું થઈ જતું નથી. ઈસ્ટ
ઈન્ડિયા કંપનીએ પણ ઈન્ડિયા લગાવ્યું હતું અને ઈન્ડિયન મુજાહિદ્દીનના નામમાં પણ
ઈન્ડિયા આવે છે. PM મોદીએ કહ્યું, વિપક્ષ વેરવિખેર અને હેબતાઈ ગયો છે. વિપક્ષના વલણ પરથી લાગે છે કે તેઓ લાંબા
સમય સુધી સત્તામાં આવવાની ઈચ્છા ધરાવતા નથી. પોપ્યુલર ફ્રન્ટ ઓફ ઈન્ડિયા (PFI)માં પણ ઈન્ડિયા નામ આવે
છે. ઈન્ડિયા નામ લોકોને ગેરમાર્ગે દોરવા માટે રાખવામાં આવ્યું છે, પરંતુ લોકો તેનાથી
ગેરમાર્ગે દોરાશે નહીં.
પીએમ મોદી ભારતની
સરખામણી ઈસ્ટ ઈન્ડિયા સાથે કરી રહ્યા છે- ખડગે
રાજ્યસભામાં ખડગેએ કહ્યું કે મણિપુરમાં યુવતીઓ પર બળાત્કાર થઈ રહ્યો છે. તે
હિંસાની આગમાં સળગી રહ્યું છે. અમે વાત કરી રહ્યા છીએ મણિપુર અને પીએમ મોદી
ઈન્ડિયાની સરખામણી ઈસ્ટ ઈન્ડિયા કંપની સાથે કરી રહ્યા છે. તમે મણિપુરની વાત કરો
ને.
જો તમે સંવેદનશીલ હોવ
તો તરત ચર્ચા શરૂ કરો - ગોયલ
પીયૂષ ગોયલે ખડગેને જવાબ આપ્યો- મણિપુરની સાથે રાજસ્થાન, છત્તીસગઢ અને બંગાળમાં
શું થઈ રહ્યું છે તેની પણ ચર્ચા થવી જોઈએ. તમે મહિલાઓ પ્રત્યે સંવેદનશીલ નથી હોત
તો ચર્ચા શરૂ થઈ હોત. ગૃહની કાર્યવાહીમાં વિક્ષેપ ના પાડો. આખો દેશ જોઈ રહ્યો છે
કે તમે દેશનું ભવિષ્ય બગાડી રહ્યા છો. જો તમે સંવેદનશીલ હોવ તો તરત જ ચર્ચા શરૂ
કરો.
તમે જેને પણ બોલાવો, મિસ્ટર મોદી, અમે INDIA છીએ - રાહુલ ગાંધી
કોંગ્રેસના નેતા રાહુલ ગાંધીએ ટ્વીટ કર્યું, " તમે જેને પણ બોલાવો, મિસ્ટર મોદી. અમે INDIA છીએ. અમે મણિપુરના ઘા
પર મલમ લગાવવામાં મદદ કરીશું. દરેક મહિલાઓ અને બાળકોના આંસુ લૂછીશું. ત્યાંના
લોકોમાં પ્રેમ અને શાંતિ પાછી લાવશે. અમે મણિપુરમાં ભારતના વિચારને ફરીથી
બનાવીશું."
આ તરફ વિપક્ષની
પાર્ટીઓનું ગઠબંધન I.N.D.I.A એ સંસદની કાર્યવાહી પહેલાં એક બેઠક યોજી હતી. જેમાં મોદી સરકાર સામે અવિશ્વાસનો
પ્રસ્તાવ લાવવા અંગે ચર્ચા કરવામાં આવી હતી. આ પહેલાં કોંગ્રેસ અને
આમ આદમી પાર્ટીએ મણિપુર પર ચર્ચા કરવા માટે સ્થગિત પ્રસ્તાવ આપ્યો હતો.