ભૂરિયાએ કહ્યું- શિવરાજ સરકારમાં સૌથી વધુ અત્યાચાર

MPના સીધી જિલ્લામાં એક આદિવાસી પર પેશાબ કરવાના આરોપમાં ભાજપના કાર્યકર પ્રવેશ શુક્લાની મંગળવારે મોડી રાત્રે ધરપકડ કરવામાં આવી હતી. તેના પર NSA લાદવામાં આવ્યો છે. તેના પર નશાની હાલતમાં યુવક પર પેશાબ કરવાનો આરોપ છે. પ્રવેશનું ઘર તોડવા માટે સરકારી સ્ટાફ જેસીબી સાથે પહોંચી ગયો છે. એસડીએમ નિલામ્બર મિશ્રા, પટવારી અને 70થી વધુ પોલીસકર્મીઓ ઘટનાસ્થળે હાજર છે.

જેસીબી જોઈને આરોપી પ્રવેશની માતા અને કાકી બેભાન થઈ ગયાં હતાં. ડોક્ટરોએ તેની સારવાર કરી. આરોપીની માતાએ રડતાં રડતાં અધિકારીઓને કહ્યું- દીકરાએ ખોટું કર્યું છે તો તેને સજા કરો. મારું ઘર તોડશો નહિ, આ ઘર મેં બહુ મુશ્કેલીથી બનાવ્યું છે. વહીવટીતંત્રની ટીમ જેસીબી વડે મકાન તોડી રહી છે.

આરોપી પ્રવેશ સીધીથી 20 કિમી દૂર કુબરી ગામનો રહેવાસી છે. તેનું ઘર પંચાયત ભવનથી 100 મીટર દૂર છે. વીડિયો સામે આવ્યા બાદ બહરી પોલીસ મંગળવારે તેના ઘરે પહોંચી હતી, પરંતુ તેને ત્યાં પ્રવેશ મળ્યો નહોતો. પોલીસે તેનાં પિતા-માતા અને પત્નીને પોલીસ સ્ટેશન બોલાવી પૂછપરછ કરી હતી. પરિવારે આ ઘટના અંગે કોઈ જાણકારી હોવાનો ઈનકાર કર્યો છે. આ પછી સવારે લગભગ 2 વાગ્યે પ્રવેશની ધરપકડ કરવામાં આવી હતી.

કમલનાથે શિવરાજને ઘેર્યા, CMએ કહ્યું- અપરાધીને નહીં બક્ષીએ
આ મુદ્દે રાજકારણ શરૂ થઈ ગયું છે. PCC ચીફ કમલનાથે કહ્યું હતું કે સીધી જિલ્લામાં એક આદિવાસી યુવક પર પેશાબ કરવાની ક્રૂરતાનો વીડિયો સામે આવ્યો છે. આદિવાસી યુવક સાથેના આવા જઘન્ય અને અધમ કૃત્યને સંસ્કારી સમાજમાં કોઈ સ્થાન નથી. આદિવાસી અત્યાચારમાં મધ્યપ્રદેશ પહેલાંથી જ નંબર વન છે. આ ઘટનાએ સમગ્ર મધ્યપ્રદેશને શરમમાં મૂકી દીધું છે. હું મુખ્યમંત્રી પાસે માગ કરું છું કે દોષિતોને કડકમાં કડક સજા આપવામાં આવે અને મધ્યપ્રદેશમાં આદિવાસીઓ પરના અત્યાચારનો અંત આવે.

મુખ્યમંત્રી શિવરાજ સિંહ ચૌહાણે કહ્યું હતું કે ગુનેગારને કોઈપણ કિંમતે છોડવામાં આવશે નહીં. તેના પર કડક કાર્યવાહી કરવામાં આવશે. આરોપીઓ પર NSA (નેશનલ સિક્યોરિટી એક્ટ) પણ લગાવવામાં આવશે.

ભૂરિયાએ કહ્યું- શિવરાજ સરકારમાં સૌથી વધુ અત્યાચાર
મધ્યપ્રદેશ યૂથ કોંગ્રેસના પ્રદેશ પ્રમુખ ડો.વિક્રાંત ભૂરિયાએ જણાવ્યું હતું કે શિવરાજ સરકારમાં આદિવાસીઓ પર સૌથી વધુ અત્યાચારો થયા છે. આમાં મોટા ભાગે ભાજપના નેતાઓ શા માટે સામેલ છે? આ કૃત્ય ભાજપની આદિવાસીઓ પ્રત્યેની માનસિકતા દર્શાવે છે.

ધારાસભ્ય શુક્લાએ કહ્યું- હું પ્રવેશને જાણું છું
જ્યારે ભાસ્કરે ધારાસભ્ય કેદારનાથ શુક્લાને પ્રશ્ન કર્યો તો તેમણે કહ્યું કે પ્રવેશ ન તો મારો પ્રતિનિધિ છે કે ન તો પાર્ટીનો કાર્યકર. જોકે તેમણે કબૂલ્યું હતું કે તે પ્રવેશ શુક્લાને ઓળખતા હતા. તે સીધીથી 20 કિમી દૂર કુબરી ગામનો રહેવાસી છે.